Dubartootni Fi Daa’imman Oromoo Mirgaan Biyya Isaanii Oromiyaa Irra Jiraachuuf MCBNO Hundeeffachuun Furmaata Waaraati!

Ibsa Damee Dubartootaa Daa’imman ABO Caamsaa 9,2021.

Dhaabni keenya addi bilisummaa Oromoo ABO’n fulbaana 13,2020 waamicha Mootummaa ceehumsa Biyyoolessa Naannoo Oromiyaa waahila qabsoo keenyaa KFOdhaan kan deeggarame Onkoloolessa 8,2020 dhaaba keenya ABO’n labsame ofitti fudhachuu keenya ibsa Akka DDD Ibsa gaafa guyyaa Onkololessa 20,2021 baasne irratti ibsinee jirra Guyyaa gaafa sanaatii kaanee haala itti milkaa’ina MCBNO mirga keenya ni eegsisa jennee waan amanneef itti dhiheenyaan ofitti fudhannee hojjachaa jirra.

Uummata Oromoo fi lammiilee Oromiyaa keessa garbummaa jaarraa tokko fi walakkaa oliif Irra ture jalaa bahanii hiree ofii ofiin murteeffachuu, mirga abbaa biyyummaa deebisanii gonfachuu, Bilisummaa diinaan sarbaman deebifachuuf wareegama qaqqaalii baasaa jiran.

Qabsoo mirga Abbaa Biyyummaaf,Bilisummaafi Wal qixxummaaf Dimokrasiif nagaan keesaa jiraannuu fi mirga dhala namaaf Qeerroon Bilisummaa Oromoo gaggeessaa ture dabalatee Lammiileen Oromiyaa Wareegama lubbuu kaffalaa turan garee hin malleef harka kufee eegalee waadaan ummata oromoo fi lammiilee Oromiyaaf galame ganamuun yeroo kamuu caalaa lammiilee Oromiyaa biyya isaanii keessa akka hin jiraanneef dararaa irra gahaa dararaa kana hundeen Damee Dubartootaa fi Daa’imman Oromoo kamuu caalaa hundeeffamni MCBNO nageenya keenyaaf amansiisaa tahuu itti amanna.

Nuyis akka Damee Dubartootaa fi Daa’imman ( DDD )ABO itti ibsa koreen Mootummaa Ceehumsaa Naannoo Oromiyaa gaafa caamsaa 8,2021 baase qabxiilee 7 guutummaa guutuutti fudhachuu keenya qabxiilee armaan gadiitiin bsina.

1, Fulbaana 30 A.L.H irraa ka’ee nageenya dhabuun keenya mootummaan gadaa isaa fixate jira jedhan dhugaa tahee argine. paartileen morkattootaa gurguddoon Oromiyaa ABO fi KFOn keessa qooda hin qabne dirqiidhaan ,lammiilee Oromiyaa kaardii filannoo fudhattan malee jechuudhaan ,hidhaa,ajjeesaa,darara hamaa irraan gahaa jiraachuun isaa mirga dubartootaa fi daa’imman keenyarratti dhibbaa hamaa uumaa jiraachuuf DDDtti MCBNO furmaata waaraa tahuu itti amanna..

2, Saamicha, doorsisa ,reebicha, hidhaa fi ajjechaan deeggartoota ABO fi KFO akkasumas lammiilee Oromiyaa irratti yeroo kamuu caalaa dararaan qaama Mootummaa bulchiinsa isaa fixateen irra gahaa jiru kun hafee Nagaa fi tasgabbiin Oromiyaa keesaatti lammiilee Oromiyaa argamsiisuuf MCBNO furmaata jennee amannee galma gahumsa isaafis hojjechaa jirra.

3, Dubartootni hawwanii fi Daa’imman (shamarran) Oromiyaa keessatti yeroo kamuu caalaa gudeeddii fi hidhaa qaama hidhataniin irratti raawwachaa jiramu kana hundeen furuuf dubartiin Oromoo biyya ishee keessa sodaa fi bir’annaa malee nagaa akka jiraattuuf MCBNO furmaata.Dubartoota Daa’imman fi lammilee Oromiayaatiif ijaaramuun MCBNO keessaa qooda keenya bahachaa jirra.

4, Mirga dubartootni Hawaasummaa fi Diinagdeeniin ijaaramuuf mirga wal qixxummaa saalaa mirkaneessuun dubartoonni hoggansa keessatti beekumsaa fi fedhii dhaan akka hirmaannaa qabaatan MCBNO taasisuuf nu baraadchisa.

Injifanno Ummata Bal’aaf!

Damee Dubartootaa fi Daa’imman (DDD) ABO.

Caamsaa 9,2021

Finfinnee ,Oromiyaa.

Qabsaawota ilmaan Oromoo angafootaa fi gameeyyii keessaa tokko kan tahan Koloneel Aliyyii Cirrii Sadaasa 11, 2017 du’aan boqotan. Addi Bilisummaa Oromoo du’aan boqochuu gooticha Koloneel Aliyyiii Cirriitiin gaddi itti dhagahame guddaa tahuu ibsa.

Qabsoon diddaa gabrummaa fi falmaa mirga Abbaa-biyyummaa Ummatni Oromoo sirna gabroomfataa alagaa dachii ofii, Oromiyaa irraa buqqisuuf geggeessaa turee fi jiru seenaa dheeraa qaba. Bu’uuref-famuu Dhaaba keenya Adda Bilisummaa Oromoo dura Ummatni Oromoo jaarmaya gaaddisa tokko jalatti akka Sabaatti isa ijaaree qabsoo isaa hoogganu qabaachuu baatus naannoo naannoo isaatti bifa adda addaatiin yeroo gara garaatti sirna gabroomfattuu alagaa irratti fincilee mirga Abbaa-biyyummaa isaa falmachuu irraa duubatti hin jenne.

Qabsoo bifa kanaan Ummatni keenya geggeessaa ture keessaa qabsoon hidhannoo kan diddaa gabrummaa fi falmaa mirga Abbaa-biyyummaa Ummatni Oromoo 1960moota keessa gooticha Generaal Waaqoo Guutuutiin hoogganamee Kibba Baha Oromiyaa, Baalee keessatti geggeessaa ture isa guddichaa fi sochiilee dhaloota Adda Bilisummaa Oromoo maddisiisan keessaahis isa tokko.

Sadaasa 11/2017 Addunyaa kana irraa du’aan kan boqotan Kononeel Aliyyii Cirrii gootota muratoo yeroo sanatti qabsoo sana hoogganaa fi geggeessaa turan keessaa tokko, Godina Baalee Ona Dalloo Mannaa Ganda Cirriitti bara 1922 Abbaa isaanii Obbo Cirrii Jaarraa fi Haadha isaanii Aadde Badheessoo Miinaa irraa kan dhalatan Koloneel Aliyyii Cirrii goota miidhaa fi roorroof hin jilbeenfanne nama ijoollummaadhaan fincilee sirna nafxanyaa irratti finciluun akka danda’amu warra karaa agarsiisan keessaa tokko. Koloneel Aliyyiin oggaa du’aan boqotan manguddoo umriin ganna 95 fi Abbaa ijoollee 42 (dhiira 20 fi dubara 22) akka turanii fi ilmaan isaanii kanas Haadhotii Warraa isaanii 4 wajjin akka horatan seenaan jireenya isaanii ni mul’aisa.

Sirni awwaalchaa Koloneel Aliyyii Cirrii guyyaa kaleessaa (Sadaasa 14, 2017) Ona Madda Walaabuu Ganda Maddaatti kan argamu iddoo awwaalcha gootota hiriyoota isaanii kanneen akka Jeneraal Waaqoo Guutuu fi Koloneel Aadam Jiloo biratti kabajaadhaan raawatame.

Addi Bilisummaa Oromoo du’aan boqochuu Koloneel Aliyyii Cirriitiin gadda guddaa itti dhagahame irra deebi’ee ibsaa, maatii fi firoottan isaaniitiif jajjabina hawwa.

Injifannoo Ummata Oromoof !
Adda Bilisummaa Oromoo

(Ijoo Dubbii ABO Sadaasa 14, 2017)

Lola kaayyoo Wayyaanee kan farra Bilisummaa Ummatootaa, farra dimokiraasii fi haqaa tahe fiixaan baasuuf bara 1992 Wayyaaneedhaan Ummata Oromoo irratti banamee waggoota 25 dabraniif osoo addaan hin citin deemaa jirutu Wayyaanee butuchee sadarkaa amma irra gahe kana (jal-bultii xumura aangoo isaa) irraan gahe. Haa tahu malee, Wayyaaneen har’as osoo shakaraata ykn. wargamsuu du’aa keessa jiruu illee lola Ummata Oromoo irratti labse kana injifachuuf abjoota. Abjuun isaa kun garuu abjuu tahee hafa. Ummatni jaalalaan malee lolaan hin mohatamu. Addi Bilisummaa Oromoos onnee Ummata Oromoo keessa kan seene lolaan osoo hin taane jaalalaani.

Biyyoota sirna dimokiraatawaadhaan bulan keessatti mootummaatu tajaajiltuu Ummataa ti. Ol’aantummaan kan Ummataa ti. Sirna/system fi Heera ol’aantummaa Ummataa kabajsiisuun waan hojjetamuuf hariiroo Ummataa fi mootummaa biyya bulchu gidduu jiraachuu qabu isatu murteessa. Waan taheef yoo mootummaan fedhii Ummata isa filatee sana guutuu hanqate ykn. galfata/amaanaa nyaate (yoo dantaa fi mirgi Ummataa tuqame) Ummatni sirnaa fi Heera sanatti dhimma bahee of irraa jijjiira.

Mana hidhaa Sabootaa tan taate Impaayera Itoophiyaa keessatti garuu dubbiin kun faallaa/fuggisoo dha. Ummatatu tajaajiltuu mootummaa ti. Sirnaa fi Heerri hariiroo mootummaa fi Ummata gidduu murteessu maqaaf xalayaa irra ni jira. Waa’ee ol’aantummaa Ummataas ni dubbata. Garuu sun akkanumaan ykn. agarsiisaaf taa’uu malee yeroo inni itti hojii irra oole mul’atee hin beeku. Waan taheef yoo Ummatni fedhii mootummaa biyya bulchuu sana guutuu hanqate (yoo gaaffii mirgaa gaafate, tarkaanfii mootummaan fudhatu kan dantaa Ummataa tuqu irratti yoo mormii dhageessisee fi walumaagala yoo callisee ajaja fudhachuu fi mataa gadi qabatee buluu dide) mootummaan hidhuu fi ajjeesuu dabalatee tarkaanfii fedhe irratti fudhata. Dhugaan kun uumamuu Impaayera Itoophiyaa irraa kaasee kan turee fi har’as akkuma itti fufetti kan jiruu dha.

Dhugaa kanaaf ragaa guddaa wanneen tahan keessaa tokko gidduu dabre kana qaamni TPLF/EPRDF “Mana Maree Nageenya Biyyoolessaa” jechuudhaan tolfate wal gahee murtii dabarsee dha. Qaamni “Mana Maree Nageenya Biyyoolessaa” jechuudhaan Wayyaaneen tolfafte kun walgahii guyyoota muraasa dura geggeeffateen gaaffii mirgaa Ummatootni kaasaa jiran (keessumattuu Qabsoo Bilisummaa Saba Oromoo) akkuma waggoota 26 dabran hunda gochaa bahetti humna waraanaatiin ukkaamsuu itti fufuuf murteeffachuu isaa ifa godhee jira. Murtiin qaama kanaa karoora TPLF/EPRDF ammas irra deebiidhaan humna tikaa fi waraanaa qabutti dhimma bahee Ummata Oromoo irratti lola labsuuf baafate fiixaan baasuuf kan akeekkate tahuun beekamaa dha.

Gaaffii mirgootaa fi Qabsoo Bilisummaa Ummatootaan (keessattuu Qabsoo Bilisummaa Oromootiin) muddamee umriin bittaa isaa guyyaa irraa guyyaatti gabaabbachaa kan jiru Wayyaaneen muddamsuu irraa dhiheenya kana gaaffii Ummataaf deebisaan waan kennamaa jiru fakkeessuuf ergamtoota isaatti dhimma bahee diraamaa sobaa hedduu qindeessee ittiin Ummata sobuuf yaalaa ture/jira. Lukkeeleen isaaf amanamoo tahan hedduunis diraamaa kana Ummata fudhachiisuuf “Haalli akka durii miti, jijjiiramatu mul’achaa jira, kanaaf ammatti mormii dhageessisuun sirrii miti…kkf.” jechuudhaan Wayyaaneef daboo bahuu eegalanii jiran. Haa tahu malee haasawa afaanii bira kutee wanti hojiidhaan lafa irratti mul’ate waan hin jirreef dubbichi diraamaa ittiin Ummata sobanii yeroo bitachuudhaan umrii aangoo TPLF/EPRDF dheeressuuf karoorfame qofa akka tahe Ummatni dafee itti dammaqee mormii isaa finiinsuu itti fufee jira.

Diraamaan sobaa ittiin Ummata gowwoomsee umrii bittaa isaa dheereffachuuf qindeeffate Ummataan itti dammaqamee jalaa fashaluu wayta arge kanatti dha egaa Wayyaaneen maqaa “Mana Maree Nageenya Biyyoolessaa” jedhu kanaan murtii Ummata keenya irratti labsii lolaa haaromsuu kan fudhate.

Murtiin Wayyaaneen amma akka haaraatti irra gahe jedhu kun Ummata Oromoof haaraa miti. Wayyaaneen Ummata Oromoo irratti kan ifatti lola labse bara 1992 yeroo Dhaaba Ummatni Oromoo filate Adda Bilisummaa Oromoo fi Ummata Oromoo wajjin lolatti seene dha. Yeroo sana irraa kaasee Wayyaaneen humnaa fi mala ofii qabuu fi gargaarsa alagaa irraa argatu hundatti dhimma bahee Ummata Oromoo fi Dhaaba Kallacha Qabsoo Bilisummaa Oromoo tahe ABO mohachuuf lola bifa hundumaan geggeessu irraa yeroon itti boqotee fi humna isaa qusatee beeku hin jiru.

Lola kaayyoo Wayyaanee kan farra Bilisummaa Ummatootaa, farra dimokiraasii fi haqaa tahe fiixaan baasuuf bara 1992 Wayyaaneedhaan Ummata Oromoo irratti banamee waggoota 25 dabraniif osoo addaan hin citin deemaa jirutu Wayyaanee butuchee sadarkaa amma irra gahe kana (jal-bultii xumura aangoo isaa) irraan gahe. Haa tahu malee, Wayyaaneen har’as osoo shakaraata ykn. Wargamsuu du’aa keessa jiruu illee lola Ummata Oromoo irratti labse kana injifachuuf abjoota. Abjuun isaa kun garuu abjuu tahee hafa. Ummatni jaalalaan malee lolaan hin mohatamu. Addi Bilisummaa Oromoos onnee Ummata Oromoo keessa kan seene lolaan osoo hin taane jaalalaani.

Gadaan Gadaa Xumura Gabrummaa ti !

Injifannoo Ummata Oromoof !

(Ijoo Dubbiii ABO Onkoloolessa 18, 2017)

Miidiyaa Wayyaanee irraan olola shiraan guutame kan jijjiirama fakkeeffamee yeroo yeroodhaan lallabamuu jalqabe kana osoo hin alanfatne akka hin liqimsine Ummata keenya hubachiisna. OPDOn jijjiirama fiduuf akka waan bilisa taatee tokkotti olola itti fakkeessii hafarfamaa jiru kanaan osoo hin dogoggorre Ummatni keenya galii qabsoo isaa kan tahe Mirga Abbaa Biyyummaa isaa harkatti galfatuuf bayyanootaa fi ciminaan, akkasumas, tokkummaadhaan akka socho’u gadi jabeessinee dhaamna.

Wayyaaneen jaarmaya farra-dimokraasii ti. Eenyummaan Wayyaanee kun waan laaftuutti jijjiiramuu danda’u akka hin taane moyxannoon ganna 26 bareechee waan agarsiisee jiruuf yeroo ammaa dhugaa kana namni hin hubanne jira hin fakkaatu. Waggoota 25 dura Wayyaaneen uumama isaa kan farra dimokraasii tahe kana irraa (Dhiibbaa hawaasa addunyaatiinis tahe dogoggora ofii irraa barachuudhaan) jijjiiramuu danda’a abdii jedhuun Wayyaanee waliin hojjetanii rakkina siyaasaa naannoo kanaa furuuf humnootni yaalan hedduu dha. Haa tahu malee, Addi Bilisummaa Oromoo sana duras maalummaa Wayyaanee hojiidhaan lafa irratti waan beekuuf gama isaatiin humna kamuu wajjin nagaadhaan hojjetanii rakkoo siyaasaa naannichaaf furmaata waaraa fiduu haalli dandeessisu yoo dhugumaan mijaawe itti hirmaachuuf qophii tahuu isaa ibsachaa fi eenyummaa Wayyaanees warra hin beekne biratti saaxilaa yoona gahe. Wayyaaneen ammoo uumama isaa kan farra-mirga ummataa fi dimokraasii irraa  jijjiiramuu akka hin dandeenye kanneen hubataniif himaa bahame. Akkuma xiinxala ABOtti eenyummaan Wayyaanee kanneen hubatuu bubbulanii fi kanneen osoo beekanii haalan jiraatan illee farra umamtaa, dimokrasii fi nagaa tahuun amma hundaaf ifa tahaa dhufe jennee amanna.

Bara Wayyaaneen humnaan mootummaa qabsiifamee kaasee ABOf, Ummata Oromoofis tahe Ummatoota cunqursaa Wayyaanee jalatti kufan hundaaf filmaatni tokkichi hafe ijaaramanii karaa danda’ame hundaan irratti qabsaawuudhaan humna farra dimokraasii fi farra nagaa naannichaa tahe kana (humna TPLF/EPRDF) humnaan gatiittii Ummatootaa irraa buusuuf qabsaawuu  qofa tahe.

Dhugaa kana tolchee hubachuudhaan, Ummata barsiisee ijaaruu fi hidhachiisuudhaan Ummatni akka mirga isaa qabsoodhaan kabajsiifatu taasisuu irratti hanga Adda Bilisummaa Oromoo kan hojjete hin jiru. Galata ABO fi Ummata Oromoo kan mirga ofii kabajsiisuuf gootummaa fi cichoominaan qabsaawee, har’aan tana Wayyaaneen eenyummaan isaa kan farra-ummataa, dimokiraasii, farra-bilisummaa fi nageenyaa tahe hunda biratti saaxilamee Ummatoota hundaan jibbamee tufamuu bira taree qabsoo Ummatootni mirga ofii kabajsiifachuuf geggeessaniin(keessattuu Qabsoo Bilisummaa Oromootiin) akka hin dandamannetti haleelamee afaan boollaa irra gahee jira. Mirgaa fi injifannoon kun qabsoo haqaa Ummatootaan (keessattuu ammoo qabsoo hadhaawaa dargaggootni Oromoo addatti fi ummanti Oromoo Dhaaba isaa ABO faana hiriiree geggeesseen) kan argamee dha.

TPLF/Wayyaaneen sadarkaa irra gahe kana(kufaatii isaa kan hin oolle) hubachuu fi irraa baaraguudhaan of dandamachiisuuf diraamaa shiraa hojjechuuf yaaluu irraa hanga du’ee awwaalamutti hin dhaabbatu. Diraamaa kanas ergamtoota isaa kanneen tahan miseensota dhaabota kaayyoo isaa ittiin galmaan gahachuuf ofii isaatii bibixxilee (gantoota Saba irraa dhalatan gananii garaa isaaniif bulan) gariitti dhimma bahuudhaan hojiitti hiikuuf tattaafachaa jira. Isaan kun ammoo yakkaa fi saamicha qabeenya Oromoo keessatti kanneen TPLF waliin qooda oolaanaa qabanii dha.  Dhaabota waahillan TPLF tahan keessaa sab-boontota kumaan lakkaawaman kanneen jijjiirraa qabsoon Ummatootaa fidaa jiru deggaranitti hudhaa fi gufuu guddaa warri tahan kanneen akkasii tahuun nama hin falamsiisu.

Dhaabota Wayyaaneen kaayyoo isaa ittiin galmaan gahachuuf tolfate keessaa tokko kan tahe OPDO keessa sab-boontotni ilmaan Oromoo kan roorroon Saba isaanii irra gahu isaan laalessuudhaan roorroo kana Saba isaanii irraa dhaabsisuuf hawwii qabanii fi jijiirama ABO fi ummatni itti jiru akka milkaawu kan hojjetan kumootaan akka turanii fi jiran dhokataa miti. Isaan akkasii caalaatti jajjabeeffamuu fi hammatamuu akka qaban, qabaa fi eeggannoon feesisu godhamuufii akka qabuu wal hubachiisuu feesisa. Isaan kun humnaa fi miiltoo falmaa bilisummaa ti. Hiriira qabsaawotaa keessatti hammatamanii Kaayyoo Bilisummaa Ummata keenyaa galmaan gahuuf waliin tarkaanfachuun dirqama qabsoo tahuu amanuudhaan ABOn kana irratti jabinaan hojjechaa har’a gahe. Fuul-duraafis kun daran ciminaan irratti hojjetama.  Mooraa qabsoo Oromoo fi tokkumman Oromoos hundeen akkasitti qabsoo irratti waliin falmuun, waliin wareegamuu fi dhiiguun qofa ijaarama jennee amanna.

Haa tahu malee, OPDOn akka jaarmayaatti wal qabatee ajaja TPLF jalaa of bilisoomsee Dhaaba dantaa Saba Oromoo tiksuuf hojjetuu fi Dhaaba jijiirama fidu tahee as baha jedhanii hawwuu fi abdachuun ykn. OPDO irraa waan akkanaa eeguun eenyummaa Wayyaanee fi hoogganoota OPDO kanneen samichaa fi yakkaan Wayyaaneetti hidhatanii jiranii wallaaluu fi gowwummaa taha.

Waan taheef Ummatni keenya Wayyaanee fi ergamtoota isaa kanneen amma illee irra keessaa OPDO Wayyaanee jalatti korkodanii hidhanii sab-boontota OPDO keessa jiranitti illee gufuu guddaa tahanii jiran akkuma sirna Wayyaanee miciliqsee irra taruudhaan galii isaatti tarkaanfatuuf akka hojjatu hubachiifna.

Ummatni keenya OPDO kan Wayyaaneen akka jaarmayaa siyaasaatti eenyummaa fi ilaacha ofiitiin/Wayyaanummaadhaan cuuphee tolfate keessaan jijjiiramni wahii as bahuu mala jedhee abdachuun dogoggora seenaa guddaa tahuu beekee ololaa fi diraamaa bifa kamiinuu fi qaama kamiinuu tolfamu irraa ijaa fi gurra cufachuudhaan ofii fi walii isaa qofa irratti abdatee jaarmayaa isaa jabeeffachuudhaan qabsoo bifa hundaan itti jiru dacha dachaan finiinsuudhaan humna farra nagaa naannichaa, farra dimokiraasii fi diina ummatoota hundaa tahe kana (TPLF) of duraa kaasuu fi  maqsuuf murannoodhaan socho’uun daandii filmaata biraa hin qabne tahuu ABOn gadi jabeessee hubachiisa.

Hubachiisa kana irra dhaabbatuudhaan, Miidiyaa Wayyaanee irraan olola shiraan guutame kan jijjiirama fakkeeffamee yeroo yeroodhaan lallabamuu jalqabe kana osoo hin alanfatne akka hin liqimsine Ummata keenya hubachiisna. OPDOn jijjiirama fiduuf akka waan bilisa taatee tokkotti olola itti fakkeessii hafarfamaa jiru kanaan osoo hin dogoggorre Ummatni keenya galii qabsoo isaa kan tahe Mirga Abbaa Biyyummaa isaa harkatti galfatuuf bayyanootaa fi ciminaan, akkasumas, tokkummaadhaan akka socho’u gadi jabeessinee dhaamna.

(Ijoo Dubbii ABO) — Diinni waloo nuti (Oromoon) akka Sabaatti qab -nu humna weerartuu alagaa kan afaan qawweetiin biyya teenya (Oromiyaa) dhuunfatee mirga biyya teenya irratti abboomuu (Walabummaa) nu sarbee dha. Humnoota weerartuu alagaa dhufaa-dabraan yeroo gara Jaarraa tokkoo fi walakkaatti dhihaatuuf Oromiyaa irratti wal jijjiiraa har’a gahan keessaa tokko kan tahe murni Wayyaanee (TPLF) kanneen isa dura turan hunda irraa haala adda taheen Saba keenya Oromoo addatti baasee akka diina innikkaatti ramaduudhaan gochaan diinummaa irratti raaw’achaa turee fi jiru kan yoom illee seenaan hin dagannee dha. Diinummaa Oromoo Wayyaaneen labsatee waggaa 26f itti jiru ABO Ummata Oromoo hubachiisuu irraa yeroon itti haara galfate hin jiru.

Wayyaaneen/TPLF imaammata diinummaa Saba keenya irratti hordofaa turee fi jiru kana qaama Saba keenyaa kan tahan ilmaanuma Oromoo keessaa namoota muraasa gowoomsaa, doorsisaa fi dantaa dhuunfaa xixiqqoodhaan sobee of maddii hiriirsuudhaan hojiitti hiikaa har’a gahe. Imaammatni shiraa fi cubbuu kan Oromoo Oromoodhaan cabsanii itti roorrisaa humnaan biyya isaa irratti abbaa of taasisanii jiraachuu kun garuu kana booda umrii dheerachuu akka hin dandeenye bilchinaa fi tokkummaan Oromummaa Irreecha 2017 kan Hora Harsadii irratti qabsoo hadhooftuudhaan agarsiisne mallattoo cimaa dha. Kun Injifatnoo QBO argamsiisaa deemuu dha.

Ayyaanota gurguddoo fi bebbeekamoo Impaayera Itoophiyaa keessatti waggaa waggaan kabajaman kanneen akka Irreechaa, Ayyaana Cuuphaa (Ximqata), Iida Ramadaanaa, Mesqel, Faasikaa…kkf. keessaa kan humna waraanaa fi meeshaa lolaa gurguddaa Helikoptera dabalateen  marfamee geggeeffamaa ture Irreecha Oromoo qofaa dha. Humni tika Wayyaanee kumaan lakkaawamu bobbaafamee ilmaan Oromoo kumootaan lakkaawaman waggaa waggaan sababaa malee hidhuu fi kaanis ajjeesuun Irreecha qofa irratti malee Ayyaana kam irrattuu hin mul’atu. Addummaan kunis mootummaa Impaayera Itoophiyaa bulchu biratti Oromoon akka lammii biyyattiitti osoo hin taane akka diinaatti kan ramadamee jiru tahuu isaaf ragaa guddaa fi mul’ataa dha.

Irreechi 2016 Hora Harsadiitti ayyaaneffatame humna waraana Wayyaanee kan lafoo, mechanized fi qilleensaatiin marfamee geggeeffamuu fi maqaa Federaalaatiin Wayyaanee/TPLF bifa barbaade hundaan harka keessa naqachuun isaa mormii kaaseen Ummata keenya nagaa irreeffachuuf bahe irratti loltoota Wayyaaneetiin rasaasni roobsamee lubbuun namoota 1000 olitti tilmaamamu (kan daa’imman, shamarranii fi manguddoon keessatti argaman) galaafatame. Fixinsi kun bara baraan sammuu Oromoo keessaa kan haqamuu fi irraanfatamuu hin dandeenye dha.

Irreecha bara kanaa (Irreecha 2017) garuu qabsoo cimaa bilchinaa fi hafuura tokkummaa Oromummaatiin namootaa fi qaamota abbootii dhimmaa hedduu hirmaachisuudhaan taasifamee fi wareegama qaalii baafameen Wayyaaneen/TPLF hanga barbaade akka harka keessa hin naqanne dirqisiisuudhaan tohannaa isaa xiqqeessuu fi laaffisuun danda’meera.

Akkanaanis Irreechi 2017 Hora Harsadiitti ayyaaneffatame marii fi hoogganummaa manguddootaa fi Abbootii Gadaatiin, eegumsa humna Foolleetiin, walumaagalatti Aadaa Sirna Gadaa fi abbummaa Ummataatiin dhuunfatamee waan geggeeffameef guutummaattis tahuu baatu harka irra guddaa nagaa fi gammachuudhaan xumuramuun isaa waan hunda keenya boonsuu fi gammachiisu tahee jira.

Bilchinaa fi hafuura tokkummaa Oromummaa kan Irreecha bara kanaa irrattii fi daangaa Oromiyaa ittisuu, akkasumas, namoota keenya gara jabinaan Somaalotni jireenya irraa buqqisaniif dirmatuuf  agarsiisne kana tikfannee, ofii fi walii keenya irratti abdannee fi wal amannee, fedhii matayyaa fi kan murnaatiin olitti fedhii fi dantaa waloo Saba keenyaa isa guddicha kan tahe Gaaffii Bilisummaa ummata keenyaaf dursa kenninee yoo waliin tarkaanfanne guyyaan diina waloo keenyaa (humna weerartuu alagaa) of irraa buqqisnee biyya teenya irratti nagaa fi bilisummaadhaan of bulchinee jiraannu fagoo hin tahu.  Kanaafis ABO wareegama feesisuu fi qooda isaa ol aanaa tahe kennuu akka itti fufu mirkaneessa.

Gadaan Gadaa Xumura Gabrummaa ti !

Injifannoo Ummata Oromoof !

Onk. 03, 2017

“Goorroo Abbaatu Hordata, Roorroo Abbaatu Dhowwata!”

Mootummaan Wayyaanee waggoota 26 dabraniif Ummata Oromoo irratti lola ifatti baneen ajjeechaa suukanneeessaa raaw’achaa jirutti dabalee kumoota hedduudhaan manneen hidhaatti guuree dararuudhaan miidhaa ol aanaa irraan gahaa jiraachuu fi kanneen ajjeechaa fi hidhaa irraa hafan saamuu fi hiyyoomsuudhaan beelaa fi kadhaaf saaxiluu itti fufee waan jiruuf,

TPLF Oromoo lafa isaa irraa buqqisuudhaan maqaa investmentiin aangawootaa fi ergamtoota isaatiif, akkasumas, alagoota biroof qooduutti dabalee qubsuma alagootaa lafa Oromoo irratti babal’isuudhaan Oromoo lafaa fi qabeenya-maleeyyii taasisuun kan ifatti mul’atuu fi akka imaammataatti irratti dalagamaa jiru tahuun eenyu jalaa iyyuu dhokataa miti. Addatti ammoo imaammata bittootni Itoophiyaa bara dheeraaf hordofan itti fufuudhaan magaalaa Finfinnee fi magaalota naannoo isii dhuunfatuuf karoora bal’aa fi tarsiimawaa (Strategic) qubsuma Oromoo (demography) jijjiiruuf sochii bal’aa gochuu irratti waan argamuuf,

Mootummaan farra ummatootaa kun ummata Oromoo akka sabaatti dhabamsiisuuf imaammata hordofaa jiruun duula ofiin adeemsisu cinaatti Ummatoota ollaa Oromoo qubatan guuza/daboo waammatuudhaan leenjisee fi hidhachiisee lolchiifatuu waan itti fufeef,

Ilmaan Oromoo Univarsitii adda addaa irraa eebbifaman kuma dhibbaan lakkaa’aman, akkasumas, kanneen barnoota sadarkaa adda addaa qaban hojii dhorkatuudhaan hiyyummaaf saaxilee hegeree dhaloota haaraa dukkaneessee waan jiruuf,

Oromiyaa keessatti (miseensotni OPDO osoo hin hafne) abbootii qabeenyaa Oromoo, beektota, dargaggootaa fi qotataa irratti hammeenya TPLF ifaa fi dhoksaan raaw’achaa jiruun lammiileen Oromoo imaammataa fi tarkaanfii diinummaa Wayyaaneef saaxilamanii abdii jireenyaa dhaban lakkoobsaan dabalaa dhufuun bal’inaan waan mul’atuuf,

Mootummaan mirgaa fi wabii jireenya dhala namaa caalaa dantaa garee ofii fi matayyaaf dursa kennu kun dhiibbaa fi tarkaanfii diinummaa Shamarranii fi Dargaggoo irratti raaw’atu irraa filmaata dhabanii kaa’imman abdii hegeree Saba keenyaa tahan biyyoota alagaatti akka baqatan dirqee gammoojjii biyya ormaa adda addaa keessatti kufanii irbaata allaattii tahuu fi galaana keessatti dhumuudhaan irbaata qurxummii tahuun guyyaa irraa guyyaatti dabalaa waan jiruuf,

Aangawootni Wayyaanee saamicha kaayyoo ofii godhatan kun tarkaanfii namoomaan alaa kan abbootii isaanii haaromsuudhaan sharafa alaa ittiin argatuuf jecha lammiilee biyyattii bifa gurgurtaan akka gabraatti daldaluudhaan rakkinootni ulfaatoo fi suukanneessooon dhala namaaf hin malle akka irra gahan taasisuun bal’inaan kan itti fufee jiru waan taheef,

Tarkaanfiilee diinummaa kanneen hunda gootummaadhaan dura dhaabbatee hanqisuuf Ummatni keenya Dhaaba isaa ABOdhaan hogganamee umrii mootummaa kanaa gabaabsuuf finciloota seena-qabeessaa fi itti fufiinsa qaban adeemsisaa turee fi itti jiruun injifannoolee gurguddoo galmeesseen har’aan tana mootummaa Wayyaanee/TPLF qarqara awwaalaa irraan gahee jiraachuun ifatti mul’ata.

Mootummaan umriin bittaa isaa gabaabbatuu of iratti arge kunis har’a-bulinnaadhaan:

1. Humna waraanaa addaa ‘Liyyuu Poolis’ jedhamu kan Somaalota irraa ijaarame leenjisee hidhachiisuudhaan Baha, Kibba-Bahaa fi Kibba Oromiyaatti Ummata keenya irratti duulchisee lolchiifatuu akka itti fufetti jira.
2. Wayyaaneen humna kana Al-Shabaabiin ittiin lola jechuudhaan Amerikaa fi Ingilizii kan leenjisiifate tahuun ni beekama. Haa tahu malee akeeka himateen alatti Ummata keenya irratti bobbaasuudhaan lolchiisuu irratti argama.
3. Humni “Ittisa Biyyaa” dhuunfata isaa tahe humna Liyyuu Poolis jedhamuuf karoora bobbaa akka baasu, dhiheessii meeshaa lolaa, nyaataa fi qoricha akka dhiheessuuf ajajuutti dabalee uffata Liyyuu Poolis itti uwwisuudhaan lola Saba Oromoo irratti adeemsifamu kana keessatti kallattiidhaan qooda fudhachiisaa jira.

Walumaagala mootummaan Wayyaanee fincila ummatootaan, addatti ammoo, Fincila Xumura Gabrummaa (FXG) Ummatni Oromoo geggeessaa jiruun akka hamaatti madaa’ee qarqara boollaa gahuu irraa dhabama irraa of hambisuuf duula bifa irra hammaataa fi tarkaanfii namoomaan alaa Ummata Oromoo irratti fudhatuudhaan umrii bittaa isaa turfatuuf abbaluu irratti argama.

Waan taheef, Ummatni Oromoo akka Sabaatti akka hin dhabamneef filmaatni tokkichi qabu mootummaa kana gateettii ofii irraa darbatee gatuu qofa. Akeekni mootummaa farra ummataa kana of irraa gatuu kunis Oromoo hundi harka wal qabatee diina isaa irratti wal-faana bobba’uu qofaan milkaawa.

Bilisummaan Ummatni keenya dharra’u akka mirkanaawuuf tarkaanfiileen armaan gadii akka fudhataman Addi Bilisummaa Oromoo waamicha isaa hundaaf haaromsa:

1. Sochii mootummaan kun Oromiyaa keessatti adeemsisu kamuu irratti tarkaanfii fudhatuun bifa haaraa fi irra cimaa taheen akka itti fufu,
2. Ummatni Oromoo gibira mootummaan bifa kamiinuu walitti qabatu baasuu akka dhaabu,
3. Sochii aangaawotnii fi hojjettootni mootummaa godhan hunda gufachiisuuf tarkaanfiin barbaachisaa tahe hundi akka fudhatamu,
4. Ummatni keenya Ona hunda keessatti bulchiinsa ofii akka utubatu, akkasumas, qaama nageenya isaa tiksu ijaarratee nagaa fi qabeenya isaa tikfatuu fi tohatuudhaan diddaa itti jiru daran finiinsee mootummaa kana karaa irraa maqsuuf akka sosso’u,
5. Addatti Qeerroon Bilisummaa Oromoo dirqama kana ofitti fudhatee milkoomina isaaf sadarkaa ol’aanaatti akka sossohuu fi
6. Ilmaan Oromoo hidhataniis tahe osoo hin hidhatin mootummaa kanaaf hojjetan hundis tarkaanfii Ummatni keenya bilisummaa ofii gonfatee jireenya Sabummaa ofiitti iggitii gochuuf fudhatu kana milkeessuuf dirqama lammummaa isaanii akka bahatan ABOn gadi jabeessee waamicha isaa dabarsa.
7. ABOn gama ofiitiin akeeka kana milkeessuuf sochii WBO, Caasaalee ABO fi Jaarmaya Ummataa jabeessuu dabalatee kan isa irraa eegamu hunda akka raaw’atu mirkaneessa.

“Goorroo Abbaatu Hordata, Roorroo Abbaatu Dhowwata !”

Gadaan Gadaa Xumura Gabrummaa ti !
Injifannoo Ummata Oromoof !

Adda Bilisummaa Oromoo
Fulbaana 12, 2017

Gumiin Sabaa Adda Bilisummaa Oromoo teessuma isaa jalqabaa kan Kora Sabaa 4ffaa ABO boodaa, Fulbaana 1 hanga Fulbaana 3 bara 2017tti geggeeffatee murtiilee fi kutannoolee Kora Sabaa 4ffaa irratti dabarfaman, akkasumas, dhimmoota hojii qabsoo fi Dhaaba keenyaa keessaa kanneen murtii GS gaafatan irratti bal’inaan marihatee  hojii irra oolchuf murtiilee armaan gadii dabarseera.

1. Hirmaannaa Qabsoo Ummata Oromoo ol kaasuu Irratti.

Qabsoon bilisummaa Oromoo ABO’n geggeeffamu, qabsoo of irratti irkannoo waan ta’eef, hirmaannaan Ummata keenyaa guddichis, Fincila Diddaa Gabrummaa gara Fincila Xumura Gabrummaatti        tarkaanfachiisee bu’aa qabatamaa waan argamsiiseef,  GS – ABO kana daran jabeessuuf hirmaannaan ummata Oromoo qooda ol aanaa qabaatuu hubatuun  murtiilee armaan gadii dabarseera.

• Caasaaleen dhaabaa hundumtuu bakka jiranitti sirna Dhaabaa hordofuudhaan ummata Oromoo fedhii ijaaramee qabsoo irraa qooda fudhachuu agarsiisaa jiru harka bal’aan akka simatan, akkasumas, qajeelfama ijaarsa Caayaalee Dhaabaa hordofuudhaan hojii Caayaalee Dhaabaa, murna hawaasaa gara garaa, ogummaa, umrii fi kkf. ijaaruu fi  miseensota haarayaa horachuu irratti kan durii caalaa jabinaan akka hojjetamu;
• Jaarmayaa hawaasaa fi afooshaalee ijaaramanii jiran keessatti hirmaannaa miseensotaa ol guddisuudhaan ilaalchaa fi fedhiin qabsoo keessatti akka calaqqisu gochuun barbaachisaa tahuu    hubatuun miseensotni hundi kana milkeessuu irratti akka hojjatan;
• Bakka aanjaan jiru hundatti wal-tajjii barnootaa fi marii qopheessuudhaan hubannoo qabsoo       bilisummaa hawaasa Oromoo ol guddisuudhaan hariiroo ummata Oromoo fi Dhaaba gidduu daran jabeessuu irratti akka hojjatamu;
• Qabsoo bilisummaa Ummata Oromoo caalaatti dhageettii fi mararfannaa kan argatu humna tahee mul’atuu danda’uu qofaan waan taheef hojii biyya keessaaf ilaalchaa fi xiyyeeffannaa addaa kennuufiin kan hojjatu tahuu GS-ABO mirkaneessaa, kanaafis ummatni keenya, addatti ammoo,   hawaasni Oromoo biyyoota alaa jiraatu qabsoo bilisummaatti daran irree horuu irratti ABO cinaa  akka dhaabbatu;

2. Sochii WBO Jabeessuu Ilaalchisee.

Mootummaan Wayyaanee Ummata Oromoo diina innikkaa godhatee tarkaanfii gara jabinaa fudhatu   babal’isuun dararaan ummata keenya irraan gahaa jiru sadarkaa ol aanaa dhaqqabee jira. Diina humnaan deemu humnaan dura dhaabbatuun alatti falli biraa ittiin qolatuun danda’amu waan hin jirreef, diina   ummata Oromoo kana karaa irraa maqsuuf WBO bifa hundaan jabeessuun barbaachisaa waan taheef ABOn kan milkeessuu irratti kan dur caalaa jabinaan akka bobba’u mirkaneessa.

3. Sochii Qeerroo Jabeessuu Irratti.

Warraaqsa biyyoolessaa Oromiyaa finiinaa jiru keessatti qoodni Qeerroon Bilisummaa Oromoo ABOn hogganamuu murteessaa tahuu qalbifatuudhaan Gumiin Sabaa ABO warraaqsa kana caalaatti jabeessuu irratti kan hojjatu tahuu, FXG itti jiramu galiin gahuufis  WBO fi Humna Ittisa Ummataa baay’inaa fi aynaan dacha dachaan ol kaasuu fi bobbaa isaa guddisuu irratti xiyyeeffatee kan hojjatu tahuu hubachiisa.

4. Ilmaan Oromoo Mootummaa Wayyaaneef Hojjetan Ilaalchisee.

Ilmaan Oromoo waraana, poolisii, tika, milishaa tahuun mootummaa farra ummata Oromoo tajaajilaa jiranii fi caasaa mootummaa kanneen adda addaa keessatti qaxaramanii hojjataa jiran keessaa garii miidhaan ummata isaanii itti dhaga’amuu irraa tarkaanfii boonsaa gara garaa fudhataa akka jiran dhokataa miti. Kanneen ummata isaaniif laalatanii tarkaanfii laaleessaa   diina irratti fudhataa jiran kana GS–ABO dinqisiifataa kanneen Wayyaaneetti michoomuun dalagaa farrummaa itti fufanii jiran gochaa isaanii irraa hatattamaan akka dhaabbatan dinniinaa, kanneen gorsa kana diduun diina waliin dhaabbatan irratti tarkaanfiin barbaachisu kan fudhatamu tahuu beeksisa.

5. Mootummootaa fi Dhaabbattoota Gargaarsa Kennan Ilaalchisee.

Biyyootaa fi hawaasni addunyaa sababa adda addaan Ummatoota Itophiyaa miidhamaniif     gargaarsa arjoomaa jirtan gargaarsi ummatootaaf ergitan bakka yaadame gahaa akka hin jirre akka hubattan GS-ABO dhaamsa isaa isiniif dabarsa.  Akka to’annoo barbaachisu gootanis  gorsa isaa isiniif dhiheessa. Gargaarsi godhamu dhimma biraa ummatoota irraan miidhaa dhaqqabsiisu irra oolaa akka jiru osoo mul’atuu fi beekamuu gargaarsa itti fufuun seenaa fi seeraan gaafachiisaa tahuu akka hubattan GS- ABOn jabeessee yaadachiisa. Miidhaa gahu irraa tarkaanfii fudhatamuufis gaafatamoon isin tahuu dabalee hubachiisa.

6. Abbootii Qabeenyaa Wayyaaneef Tumsitaniif.

Mootummaan Wayyaanee ummata Oromoo hiyyomsuu fi beelessuun of duroomsaa akka jiru addunyaa hundatu argaa jira. Akkasumas, kanneen mootummaa kanatti hidhatanii saaminsa Ummata irra gahuun duroomaa jiran akka jiranis hubatamaa dha. Ummata hiyyoomsuudhaan ofii duroomuun farreen ummatootaa kun yakka ol aanaa fi gochaa farrummaa waan taheef Gumiin Sabaa ABO jabeessee abaara. Kanneen gochaa akkanaa irratti bobba’anii jiran hundas gochaa isaanii kana hatattamaan akka dhaaban dinniinaa, kanneen kana irra tarkaanfatuun saaminsa ummata Oromoo irra geessisuu itti fufan irratti tarkaanfiin barbaachisu kan fudhatamu tahuu GS-ABO beeksisa.

7. Olola Farra Qabsoo Oromoo Oofamu Ilaalchisee.

Olola dharaa fi afanfaajjessaa diinaa fi masaanotaa of irraa faccisuun akka danda’muuf,        ummatni keenya saba-himaalee Dhaabaa jabeessuu irratti gumaacha godhaa jiru galateeffachaa fuula duraafis jabinaan akka itti fufu gaafata. GS-ABO gama isaatiin dirqama isaa gahummaan bahatuuf fardoominaan kan irratti hojjatu tahuu addeessa.

8. Dinagdee Dhaabaa Guddisuu Irratti.

Qabsoon Bilisummaa Oromoo kallattii adda addaan adeemsifamaa jiru sadarkaa kana kan dhaqqabe qabsoo of irratti irkannoo gaggeeffamaa jiruuni. Qabsoo keenya sadarkaa ol’aanaa irra gahee jiru kana caalaatti jabeessuuf qabeenya guddaa kan gaafatu tahuu beekuudhaan      GS-ABO galii dinagdee Dhaabaa gabbisuu irratti xiyyeeffatuun kan hojjatu tahuu           mirkaneessaa, kana keessatti hirmaannaan ummata keenya biyya keessaa fi alaa jabaatee akka itti fufu GS – ABO waamicha isaa hundaaf dabarsa.

Gadaan Gadaa Xumura Gabrummaa ti !
Injifannoo Ummata Oromoof !

GS-ABO
Fulbaana 3, 2017

Korri Sabaa 4ffaan Adda Bilisummaa Oromoo bakka bu’ootni Miseensota ABO, bakka bu’ootni Caayaalee ABO, bakka bu’ootni waldaalee fi murnoota hawaasaa adda addaa fi keessummootni afeeraman bakka argamanitti Hagayya 20 – 30, 2017 haala ow’aa fi mirqaansaa taheen gaggeeffamee injifannoodhaan xumurame.

Korri Sabaa kun kan geggeeffame wayta ummatni Oromoo, Addi Bilisummaa Oromoo fi Qeerroon Bilisummaa mootummaa Wayyaanee wajjin yeroo kamiyyuu caalaatti falmaa hadhaawaa gageessaa jiran keessatti.

Korri kun Gabaasa Gumii Sabaa Gadaa dabree dhaggeeffatee, dhimmota Qabsoo Bilisummaa, hegeree Oromoo fi Oromiyaa, akkasumas, Idil-Addunyaa bal’inaan marihachuudhaan Sagantaa Siyaasaa fi Heera ABO gilgaalee, wayyeessa barbaachisu hunda gochuudhaan raggaafatee jira.

Korri kun Gabaasa Gumii Sabaa Gadaa dabree dhaggeeffatee, dhimmota Qabsoo Bilisummaa, hegeree Oromoo fi Oromiyaa, akkasumas, Idil-Addunyaa bal’inaan marihachuudhaan Sagantaa Siyaasaa fi Heera ABO gilgaalee, wayyeessa barbaachisu hunda gochuudhaan raggaafatee jira.

Qabsoo Bilisummaa Oromoo fi Walabummaa Oromiyaa ABOn durfamu galiin gahuuf hoggana ititaa Dhaabicha fuul-dura tarkaanfachiisuu dandayu of keessaa filatee irbuu seensisuudhaanis dirqamaa fi itti gaafatama hoogganummaa itti kennee jira. Akka kanaan Korri Sabaa 4ffaan ABO kun Murtiilee fi Kutannoolee armaan gadii dabarfatee Injifannoodhaan xumuramee jira.

1. Korri Sabaa 4ffaan ABO tarkaanfii Ummatni Oromoo, Qeerroon Bilisummaa Oromoo fi Waraanni Bilisummaa Oromoo mootummaa gabroomfataa Wayyaanee fi ergamtoota isaa irratti fudhachaa jiran dinqisiifachaa, qabsicha daran finiinsuuf ciminaan akka hojjetamu murteesse. Kanuma waliin Ummatni keenya diinaan kokkee wal qabee, sochii seena-qabeessa bilisummaa fi Walabummaa Oromiyaaf geggeessaa jiru daran finiinsee sirna gabrummaatti xumura gochuuf caalaatti akka socho’u waamicha keenya haaromsina.
2. Waraanni Bilisummaa Oromoo (WBOn) Irree fi Gaachana Ummata Oromoo ti. Waan taheef aynaa, heddummina, hidhannoo fi dandeeytii isaa ol guddisuudhaan umrii humna weerartuu Wayyaaneetti xumura itti gochuuf dhiheessii barbaachisu hundi akka WBOf guutamu ciminaan ni hojjenna.
3. Qeerroon Bilisummaa Oromoo hogganummaa ABOn qajeelfamu, warraaqsa biyyoolessaa Oromiyaa keessatti finiinsaa jiruuf qoodni WBO fi Humna Ittisa Ummataa dacha dachaan akka dabalamuuf GS ABO bobbaa barbaachisu irratti akka xiiyyeeffatu KS 4ffaan ABO murteesse.
4. Hiriira nagaa mirga Abbaa-biyyummaa falmachuuf bahame keessatti ajjeechaa raaw’atamaa jiruu fi dhumaatii Onkoloolessa 2, 2016 Hora Har-sadeetti raaw’atame, tarkaanfii shoororkeessummaa labsii yeroo hatattamaa fi bulchiinsa waraanaa (Command Post) Oromiyaa irratti raaw’atee fi raaw’ataas jiru sagalee ulfaataadhaan balaaleffachaa, gochaa suukenneessaa ilmaan Oromoo irratti raw’ateef Mootummaan Wayyaanee seera duratti dhihaatee akka itti gaafatamuuf jabinaan ni hojjenna !
5. Mootummaan goolessituu Wayyaanee gochaa shanyi-duguggii, hidhaa fi saamicha ummata Oromoo irratti geessisaa jirtu hatattamaan akka dhaabdu, hidhamtoota siyaasaa fi qabsaawota maqaa ABO, Oromummaa fi dhaabota biraa deggeruu qofaan hidhaman hundi akka gadi dhiifaman akeekkachiisna !
6. Gochaa shoorarkeessitummaa Wayyaanee irraan kan ka’e, Oromoota qe’ee fi qabeenya isaanii gadi dhiisuu dirqamanii biyyoota adda addaa keessatti baqatummaan dararamaa jiran hundi, mirgi baqatummaa isaanii akka kabajamuuf qaamota Addunyaa mirga baqattootaa tiksanii fi mootummoota baqattoonni Oromoo keessa qubatan hunda gadi jabeessinee gaafanna.
7. Mootummaan Wayyaanee saamicha dorgomaa hin qabne deemsisuu bira taree, daldala dhala namaa (Human slavery) addatti ammoo dubartoota maqaa hojiitiin gurgurataa jiraachuun miidhaa suukanneessaa geessisaa jira. Korri Sabaa 4ffaan ABO kun gochaa farra dhala-namummaa kana jabeessee balaaleffachaa, daldalli gurgurtaa dhala namaa bifa haaraan geggeeffamaa jiru kun hatattamaan akka dhaabbatu akeekkachiisna !
8. Weerarri Wayyaaneen maqaa Liyyu Polisii fi kallatti addaa addaatiin qindeessitee “seera” ofii baafatteen alatti lafa Oromoo bulchiinsa Ollootaa jalatti galchuuf gochaa jirtuu fi gochaan suukkanneessaa, samichaa fi ajjeechaan raw’achaa jirtu imaammata shiraa isiin Ummatoota walitti buusuuf hordoftu tahuu hubannee, kanneen kana keessatti qooda fudhattan martinuu akka irraa dhaabbattan hubachiisaa, humni weeratuu hatattamaan lafa Oromo akka gadi lakkisu dinniinna!
9. Dhaabootni Oromoo Hiree-murteeffannaa Ummata Oromootti amanan hundi garaa-garummaa xixiqqoo gidduu isaanii dhiphisanii mooraa qabsoo Oromoo gabbisuuf, ABO waliin akka Qabsoo Bilisummaa qindeeffatan Korri Sabaa 4ffaan ABO waamicha lammummaa dabarsa.
10. Ilmaan Oromoo sadrkaa adda addatti caasaa mootummaa Wayyaanee keessa hoojjattan, yakka mootummaan Wayyaanee Ummata Oromo irratti raaw’ataa jirtu hubatuudhaan sochii warraaqsa biyyoolessaa hogganummaa ABOn, Qeerroo fi ummatni Oromoo finiinsaa jiraniif golgaa ta’uun akka ummata keessan bira dhaabbattan waamicha lammummaa dabarsina.
11. Ilmaan Oromoo kanneen humna waraanaa, tika, poolisaa, bifa milishaa gandaan fi bifa adda addaan caasaa mootummaa Wayyaanee tajaajilaa jirtan, akeekni mootummichaa ummata keenya mirga Abbaa biyyummaa sarbuu fi balleessuu akka tahe hubattanii hidhannoo fi humna qabdan hunda gara mootummaa gabroomfataa kanatti akka naannessitan waamicha lammummaa isiniif goona.
12. Biyyootiin Dhihaa maqaa gooolessitummaan loluu jedhuunii fi Mootummootni adda addaa, humnotni siyaasaa fi jaarmiyaaleen dantaa ofiif jecha mootummaa Wayyaanee aangoo irra tursuuf gargaarsa gootaniif Wayyaaneen gargaarsa kana Ummata Oromoo fi kanneen biroos ittiin gidirsuu dabalatee badiilee hedduuf kan dhimma itti bahaa jirtu akka tahe hubbattanii gargaarsa keessan akka irraa dhaabdan gadi jabeessinee gaafanna.
13. Gocha yakkaa kan mootummaan Wayyaanee, namootni dhuunfaa fi kubbaaniyoonni maqaa investment fi misoomaatiin ummata Oromoo lafa irraa buqqisuun of duroomsaniin ni balaalleefanna! Itti gaafatama seeraa jalaa akka hin baanees gadi jabeessinee akeekkachiisna !
14. Beektota, Artistootaa fi Atileetota Oromoo sadarkaa gara garaatti qooda ummata Oromoo ol kaastanii Addunyaatti beeksisuu keessatti qooda guddaa gumaachitan hunda dinqisiifachaa, qooda kennaa jirtan ammas dacha dachaan jabeessuudhaan hirmaannaa keessan akka itti fuftan waamicha isiniif dabarsina.
15. Jaallan Qeerroo Bilisummaa Oromoo fi Walabummaa Oromiyaaf sochii seena-qabeessa geggeessaa jirtan, sochiin keessan warraaqasa diddaa garbummaa Addunyaa keessatti argamee hin beekne tahuu fi seenaa Addunyaa keessatti boqonnaa haaraa kan bane ta’uu isaatiin raajeffachaa, kabajaa fi abdiin qabsaawotnii Ummatni keenya isiniif qaban ol’aanaa tahuu hubattanii, dirqama seenaa ofitti fudhattan Injifannoodhaan xumuruu fi galmaan gahuuf sochii keessan dacha dachaan akka itti fuftan dhaammanna.
16. Hawaasni Oromoo biyyoota alaa jiraatu WBO fi Qeerroo falmaa Qabsoo Bilisummaa Oromo geggeessaa jiruuf qabeenyaa fi beekumsaan deggersaa fi gumaacha irraa eegamu ga’ummaan akka kennu gaafanna. Kanneen tika wayyaaneetiin mindeeffamanii akka gartuuttis ta’e akka dhuunfaatti golgaa Media Hawaasummaatiin qabsoo fi qabsaawota, akkasumas, hundee Oromummaa xiqqeessuun, safuu Oromo cabsuutti bobba’an akka badii itti jiran irraa dhaabbataniif gorsaan ykn kophxeessuudhaan tarkaanfii sirressuu akka irratti fudhatus waamicha goona. Walumaagalatti Qabsoo Bilisummaa fi Walabummaa Oromoo jabeessuu malee gochaa diinaaf faayidaa kennu irraa akka of eeggattan jabeessinee dhaammanna.
17. Ummatni Oromoo haqa ofi malee kan biraa hin barbaadu. Waan ta’eef, sabootni cunqurfamtoonni Oromiya keessas ta’e ollaa Oromiyaa jiraattan waliif tumsuun qabsoo gita bittuu Wayyaanee hundeedhaan buqqisuu irratti akka waliin hojjennu Korri kun waamicha dabarsa. Kanuma waliin Tumsi Ummatotaa kan Bilisummaa fi Dimokiraasiif dhaabbate (PAFD) akeeka isaa akka bakkaan gahuuf ciminaan akka hojjetu ABOn waadaa isaa haaromsa.
18. Biyyootni fi Ummatootni Ganfa Afrikaa nagaa waaraa akka argataniif mootummootni, humnootni siyaasaa kan mormitoota ta’anii fi kan Idil-Addunyaa martuu Qabsoo Ummatni Oromoo nagaa, dimokiraasii fi Abbaa-biyyummaaf taasisu bira akka dhaabbattan waamicha dabarsina. Keessattu, humnootni siyaasaa Impaayera Itoophiyaa keessatti sirna wayyanee waliin keessaa fi alatti falmaa gochaa jiran Ummatni Oromoo mirga isaa argatu malee nageenyi waaraan naannoo kanatti argamuu akka hin dandeenye hubatanii Adda Bilisummaa Oromoo waliin akka dhaabbatan hubachiisna.
19. ABOn Qabsoo mirga Ummatootaa, Dimokiraasii fi mirga dhala namaa kabjsiisuuf, kanneen qabsaawan hunda waliin hojjachuuf qophii tahuu isaa mirkaeessaa, Mootummaa Wayyaanee kan sirna siyaasaa, dinagdee, waraanaa fi tikaa diriirseen ummatoota hunda hiyyumaa, gadadoo fi hacuuccaa dorgomaa hin qabneef saaxile karaa irraa maqasuuf akka waliin hojjannu gadi jabeessee waamicha godha.
20. Tarkaanfiilee shiraa kan handhuura Oromiyaa Finfinnee Oromiyaa irraa adda baasuuf taasifamu hunda dura dhaabbannee ittisa feesisu hunda ni goona !
21. Qabsoo Bilisummaa Oromoo ittisa irraa gara haleellaatti cahee jiru daran shaffisiisuuf, sochiin fuula hundaan taasifamaa jiru akka babal’atuu fi daran finiinu taasisuu irratti ABOn ciminaan hojjechaa jiraachuu hubatuudhaan Ummatni Oromoo bal’aan Falmaa Xumura Gabrummaa kanaaf akka of qopheessu waamicha waliigalaa dabarsina.

Gadaan Gadaa Xumura Gabrummaa ti !
Injifannoo Ummata Oromoof !

Kora Sabaa 4ffaa ABO
Hagayya 30, 2017

ABOn murtti Gamtaa Afriikaa Siidaa Bittootaa dhiiga ilmaan Oromoo fi cunqurfamoo dhangalaasaa bahan akka Finfinnee Keessatti ijaaramu murteesse jabeessee balaaleffata. Duras dhaabbata. Ummatni Oromoos kanneen ilmaan isaa fixaa turan, lafa isaa irraa buqqaasuun hiyyoomsan, eenyummaa isaa irratti duuluun dhabamsiisuu irratti hojjataa turaniif siidaa dhaabamu jabeessee balaaleffatuu fi dura dhaabbatuu qaba.

Ardiin Afriikaa Ardii boodatti hafummaan beekamtu, beelli, dhukkubnii fi hiyyummaan keessatti dagaage, of danda’uu dadhabuu irraa biyyoota dureeyyii irratti hirkatuun deggersaa fi gargaarsa isaaniin jiraattu dha. Ardii mirgi siyaasaa fi uumaa ummatootni qaban keessatti hin kabajamne, mirga ofiif qabsaawuu fi gaafatuun yakka taasifamee lammileen keessatti ajjeefaman, hidhamanii fi keessaa baqatan, Ardii walabummaa irra kolonummaan itti hawwatamu akka taatetti jirti.

Qaanii fi salphina akkaan ulfaataa kanneen keessaa silaa baasuun dirqama/hojii kanneen aangoo siyaasaa dhuunfatuun biyya dursina jedhanii ture. Haa tahu malee hiree ummatoota Ardii kanaa tahee mootummootni dhimma biyya hoggananii fi ummata bulchaniif dursa kennuun rakkoo siyaasaa, dinagdee fi hawaasummaa furuuf hojjatan hin argatne. Kan argatan yo jiraatanis qubaan lakkaa’amu. Hedduu matootii Afriikaaf fardiin akkaataa itti aangoo irra turan falachuu fi mormitootni akka hin jiraanne shiruun dhabamsiisuu dha. Meeshaalee sab-qunnamtii dhuunfatuun ololaan bittaa ofii jireessuu fi sagalee ummatootaa ukkaamsuun umrii bittaa ofii dheereffatuu irratti hojjatuu dha.

Matootiin biyyoota Afriikaa dhaabbata Gamtaa Afriikaa jedhu jalatti gurmaa’an walakkaa jaarraa oliif wagga waggaa fi akka barbaachisaa tahetti wal gahan. Haa tahu malee Gamtaan Afriikaa kun hojii ulfaatoo fi fardii Ardii Afriikaa fi ummatoota Afriikaaf tahu hojjachuuf osoo hin taane irratti wal faarsuu fi wal deggeruuf kan wal gahan tahuu waggootni 50 ol dabarsan ragaa tahu. Kana irraa har’as biyyootni Afriikaa hedduu mootummaa deggersa ummata biyya bulchanii hin qabneen durfamu. Kana irraas ummatootni biyyoota Afriikaa hedduun mootummoota farra dimokraasii fi abbaa irree jalatti hiraarfamaa jiran.

Kan ajaa’ibu qaphxiileen fardii fi irratti mari’atamuu qaban akkanaa kaafamanii kan irratti hin mari’atamne tahuu dha.

Hojiin Gamtaa Afriikaa dursa argatuu qabu silaa rakkoolee biyyoota Afriikaa gidduu akka itti furan ilaallatuu, rakkoo siyaasaa biyya tokko keessatti mul’atuun kanneen gaaffii mirgaa kaasuu irraa kumootaan ajjeefaman, kuma kudhanootaan hidhaatti guuramanii fi kumootaan baqachiifaman irratti mari’atuun furmaata itti gochuu, dhukkuba, beelaa fi hiyyummaa Afriikaa qaanfachiisee fi jilbeenfachiiseef furmaata argamsiisuuf mari’atuu ture.

Matootiin Afriikaa horii ummataa fi biyya dursanii miliyoonotaan lakkaa’amu dhangalaasuun wal gahan kanneen garuu kan yeroo isaanii dabarsan dhimmoota bubuutuu fi fardii hin taane irratti. Kana irraahis wal gahiin Gamtaa Afriikaa Adoolessa 3-4, 2017 taa’e siidaan Hayle Sillaasee fi Mallas Zenawi akka ijaaramu murteessee ka’uun kana caalaatti ibsa.

Kanneen Siidaan haa ijaaramuuf jedhaman, ummatoota bitaa turan biratti jibbamoo, sirna booddeessaa fi abbaa irrummaa dursuun kan beekamani dha. Ummatootni Itophiyaa kana irraa ti bara 1974 mootummaa H/Sillaasee irratti finciluun kan aangoo irraa gugsan. Mallas Zeenaawis taanaan takkaahuu ummatootni Itophiyaa akka dursaa isaanitti osoo hin fudhatiin kan addunyaa kana irraa dabre dha. Sirni utubee dabres mormii ummatootaan hudhamee dhabamatti kan arreedaa jiru tahuu siidaan akka ijaaramuuf kanneen murteessan jalaa dhokataa dha jedhamee hin yaadamu.

ABOn murtiin kun seenaa boodatti deebisuu kan kajeelu, faallaa dimokraasii tahuutti amana. Matootii sirna booddessaa fi Abbaa irree dursaniif kan beekkannoo kennu, qabsoo ummatootni bilisummaa fi dimokraasiif godhan dura kan dhaabbatu tahuutti fudhata. Kanneen har’a yaadaa fi fedhii ummatoota Itophiyaa osoo hin qoratiinii fi hin hubatiin, lafee fi dhiiga qabsaawota bilisummaa fi dimokraasii irratti siidaan mallattoo abbaa irrummaa akka dhaabbatuuf murteessan bor kan Emperor Bokaasaa, Idi Amiin, Mangistuu H/Mariyaamii fi kanneen biroo akka ijaaramuuf murteessuu irraa boodatti hin deebi’an.

Kanaaf ABOn murtii Gamtaa Afriikaa kana jabeessee balaaleffata. Duras dhaabbata. Ummatni Oromoos kanneen ilmaan isaa fixaa turan, lafa isaa irraa buqqaasuun hiyyoomsan, eenyummaa isaa irratti duuluun dhabamsiisuu irratti hojjataa turaniif siidaa dhaabamu jabeessee balaaleffatuu fi dura dhaabbatuu qaba. Kanneen bilisummaa fi dimokraasiif qabsaawan hundis murtiin kun faallaa dimokraasii fi bilisummaa tahuu hubatuun akka dura dhaabbatan ABOn waamicha isaa dabarsaaf.

Injifannoo Ummata Oromoof!
Adda Bilisummaa Oromoo
Adoolessa 6, 2017

Ebla 18, 2017 gabaasaa “Komiishina Mirga Namoomaa Itophiyaa”, Mana Marii mootummaa Wayyaanee/EPRDF irratti dhihaateen, gaaffii karaa nagaa ummata Oromon dhihaataa turee fi Ayyaana Irreechaan wal qabatee lammiileen Oromoo ajjeefaman 462 tahuu, bulchiinsa Amaaraa keessaa 140, Ummatoota Kibbaa irraa 34 ajjeefamuu gaafatamaan Komishinichaa Miseensi ABUT Addisuu Gabregzabiher gabaasa dhiheesseen ibsee jira.

Qormaatni qaama komiishina Mirga Namoomaa Itophiyaa Wayyaaneen durfamu kanaan dhihaate akkuma eegamaa turetti dhumaatii ummata Oromoo irra gaheef qaama dhimmi hin ilaalle ykn gaafatamaa tahuu hin qabne gaafatamaa taasisuun kan haqaaf hin dhaabbanne tahuu mirkaneesse. Komishinni kun kanneen gaafatamoo taasise keessaa tokko ammoo Ummata Oromoo, ABO, KFO, fi OMN dha.

Komiishina Mirga Namoomaa Wayyaaneen utubamee Wayyaaneen hogganamu ABO fi ummatni Oromoo bal’aa, akkasumas ummatootni Itophiyaa, haqni ifa tahee kanneen ajjeechaa kana raawwatanii fi raawwachiisan murtii seeraaf ni dhihaatu jedhanii goonkumaa hin eegne. Killee Bofa Irraa Wuciin Lukkuu waan hin argamneef.

Tarkaanfiin gara jabinaa lammiilee gara garaa irratti raawwatuun waggoota as aanan lameen fincilli ummatootaa bakka gara garaa mul’atan keessatti hin jalqabne. Finciloota as dhihoon durattis ajjeechaan Oromiyaa bakkoota adda addaa irratti fi yeroo adda addaatti, ummata Finfiinnee irratti 2005, Ummata Sidaamaa, tarkaanfiin sanyii duguuggii ummata Gambeellaa, Ogaadeen, Koonsoo fi kanneen biroo irratti raawwatameera. Mootummaa Wayyaanee birattis kanneen tarkaanfii suukanneessaa akkanaa fudhatanii fi fudhachiisan jajjabeeffamanii badhaafamu. Murtii seeraaf hin dhiheeffaman. Muummicha Ministeraa ammaa Hayilemariyam Dessaleny, fixiinsa ummata Sidaamaa keessatti kan qooda qabu, duguuginsa sanyii Gambeellaa keessatti raawwatame keessatti ajajuu fi raawwachiisuun kan shoora ol aanaa taphate Dr. Barnaabas osoo murtii seeraaf hin dhiheeffamiin hafuun ajjeechaa babal’ataa dhufeef sababa tahee argama.

Mootummaan Wayyaanee dhumiinsa ummata Oromoo irra gahe dhoksuuf guddoo tattaafataa akka ture beekamaa dha. Dhoksuu wayta dadhabetti ammo lakkoobsa lammiilee waraannii fi poolisi sirnichaa ajjeese xiqqeessuun dhumiinsa gahe golguuf yaaluunis mul’ataa ture. Kunis wayta fudhatama dhabetti, ajjeechaa fi miidhaan ummata irra gahe qoratamee kanneen miidhaa geessisan kan itti gaafataman tahuu beeksise. Haa tahu malee kun hundi yeroo ittiin bitatuuf tooftaa itti gargaarame dha.

ABOn jalqaba irraa eegalee dhumaatiin ummata Oromoo irras tahe ummatoota mirga isaanii gaafatan irratti raawwatame qaama walabaa fi hin baabsineen akka qoratamu gaafataa ture. Hanga qaama walaba taheen hin qoratamnettis yakki dalagamee fi kanneen yakka hojjatan ifa bahuu akka hin dandeenye ABOn hubachiisuu irraa of hin qusanne. Haa tahu malee mootummaan Wayyaanee gochaa isaa waan beekuuf qormaatni walaba tahe akka gaggeeffamuuf gaaffii Mootummoota Gamtooman (UN), Gamtaa Awuroppaa (EU) fi dhaabbiilee mirga namoomaaf falman irraa dhihaate diduun yakki duguuginsa sanyii raawwataa turee fi jiru akka ifa hin taane murteeffatuun qormaata walabatti ulaa isaa cufe. Kan haqaaf dhaabbatuu fi of irratti amantaa qabu qormaata qaama walaba taheen gaggeeffamu waan sodatuu fi diduuf hin jiru. Haa tahu malee mootummaan Wayyaanee ummatoota irratti kan raawwate waan beekuuf, komiishinni walabaa dhimma kana qoratuun dhugaa jiru ifa godhee ana saaxila kan jedhu irraa jabeessee dura dhaabbata.

Gabaasa Komiishina Mirga Namoomaa mootummaa Wayyaaneen hogganamuun dhiheeffame: Komiishina baabsummaa irraa walaba hin taane qaama mootummaa taheen kan qoratame waan taheef,

Komiishinni kun aantummaa mootummaa Wayyaaneef qabutti dabalee qormaatni gaggeesse jedhuu guutuu Oromiyaa kan hin haammatne tahuu irraa guutummaatti fudhatama kan hin qabne tahuu ABOn hubachiisa. Kanuma waliin qormaata kanatti rigatamee ayyaana irreechaa Oromoo miliyoonotaan kabajamu fuula duratti ugguruuf abballii mootummaan Wayyaanee Komishina kana keessaan godhu ABO fi ummatni Oromoo humna guutuun kan dura dhaabbatan tahuu hubachiisa.

Ammas taanaan dhumaatii ummata Oromoo fi ummatoota kaan irratti raawwatame qaama walaba taheen qoratamee ummatootni haqa jiru akka hubachiifaman, kanneen gochaa sukaneessaa raawwatuu fi raawwachiisuu keessatti qooda qabanis murtii seeraaf akka dhiheeffaman, dhaabbattootni Idil Addunyaa, Gamtaan Awrooppaa, mootummootni gara garaa fi jaarmayaaleen mirga namoomaaf falman hundi dhiibbaa barbaachisu mootummaa Wayyaanee/TPLF irratti akka jabeessan ABOn irra deebi’ee yaadachiisa.

Injifannoo Ummata Oromoof!
Adda Bilisummaa Oromoo
Ebla 20, 2017