|
(Madda Oduu ABO/MOA/06/05, 2010) Koreen Kutaa ABO Australia fi Koreen Hojii Raawwachiiftuu Konyaa ABO Victoria wal tahuudhaan marii guyyaa tokkoo Hawaasa Oromoo magaalaa Melbourne keessatti argamniif qopheessan Waxabajjii 06-2010 gaggeessamee jira. Hawaasni Oromoos yaamicha dhihaateef simatee walitti dhufuudhaan marii jajjabduu qabsoo bilisummaa Oromoo of dura hiiqsu gumaachu irratti bal’inaan mariyataniiru.
Marii kana irratti Jaal Abbaa Caalaa Lataa, Miseensi Shanee Gumii fi Damee Dantaa Jaarmayaa fi Siyaasaa ABO bifa “Teleconference” dhaan haala qabsoon bilisummaa Oromoo har’a keessatti deemsifamaa jiru, hawaasa Oromoo irraa akka sabaatti yeroo ammaa maal akka eegamuu fi cicha sabni keenya bilisummaa biyyaa isaa keessatti dhabe deebisachuuf biyya keessaa itti wareegamaa jiruuf caalaatti birmachuun kan yeroon kennamuufii hin qabne tahuu bal’inaan ibsanii jiran.
Dabalees, mootummaan Wayyaanee humnaan biyya keenya qabatee, ummata keenya iyyoomsaa, biyya irraa godaansisaa, ajjeesaa fi hidhee dhugaa qaban irratti murtii du’aa murteessaa jiru mo’atamuun waan hin oolleef qabsoo keenya bakka jirruu haa jabeessinu, hawaasni Oromoo biyya ormaa jiraattan bifa kamiinuu qabsoo saba keessanii waan dandeessaniin gumaachaa jechuun dhaamsa ergaa jajjabaa qabu dabarsanii jiran.
Kana malees, jaal Gaashuu Lammeessaa, Miseensi Gumii Sabaa fi gaafatamaan Birkii fi Beeksii fi Odeessii ABO biyya alaa mootummaan afaan qawween biyya keenya irra qubatee jiru bifa kamiinuu diinummaa malee firummaa ummata kana irraa horataa waan hin jirreef, aangoo humnaa qabatee fi sobaan addunyaa gowwoomsuuf yaalaa akka jiru ibsanii jiran. Dabalees gaaffii ijaaroo fi qabsoo bilisummaa Oromoo of dura tarkaanfachiisan, bifa dhaamsaan hawaasni keenya hubachuu qabu hirmaattota irraa dhihaateef, akkuma Jaal Abbaa Caalaa, deebii gahaa kennanii jiran.
Yaadonni hamilechiisaa fi qabsoo bilisummaa Oromoo gabbisan naannoo jiramuu fi bakka kaaniif illee fakkeenya tahee hojjatamuu qaban jajjaboon hirmaattota irraa dhihaatee, mariin Kun sirna hedduu hawwataa fi afuura lammummaan guutameen xumuramee jira.
Injifannoon Ummata Oromoof!!!
|
