(Madda Oduu ABO/MOA/ Adoolessa 2,2008) Magaalaa Shaashamannee jiraataa ganda 08 kan tahe Sabboonaan Oromoo Sheek Alii Baraartii Oromummaa isaaniin yakkamanii dararaa mootummaan wayyaanee yeroo gara garatti irraan gahaa tureen miidhamanii lubbuun akka dabaran baramee jira.
Sheek Alii Baraartii mootummaa gabroosaa wayyaaneen qabamanii manneetii hidhaa sirnichaa kanneen akka Ma'akalaawii, Qaallittii fi bakka biroo keessatti ganna 8 guutuuf dararamaa akka turan odeessi nu gahe ni mirkaneessa.
Sirni awwaalcha isaanii ammoo bakka maatiin, hiriyoonni fi ummanni Oromoo dhibbootaan lakkaawamu argametti raawwatamee jira.
Maddi Oduu ABO fi Sagaleen Bilisummaa Oromoo maatii, hiriyoottanii fi firoottan isaaniif jajjabina hawwaa lubbuu isaaniif ammoo rabbiin jannata haa kennuuf jedha.
**************
Godina Harargee Lixaa keessatti barattoonni Oromoo manneen barumsa sadarkaa 1ffaa fi 2ffaa haala QBO irratti mari'atan.
(Madda Oduu ABO/MOA/ Adoolessa 2,2008)Godina Harargee Lixaa keessatti barattoonni Oromoo manneen barumsa sadarkaa gara garaa barataan Waxabajjii 29/2008 barumsa isaanii erga xumurataniin booda dirqama qabsoo bahuuf walitti dhaammatanii jiru.
Marii godhataniin booda ibsa ejjennoo qabxiilee gara garaa qabu baafataniin, QBO ABOn durfamu cinaa hamma wareegama lubbutti ni dhaabbanna jedhan. Barattoonni Oromoo guutummaa Oromiyaa keessatti argaman hundi yeroo booqannaa isaaniitti waan dandeettii isaaniin qabsicha akka jabeessan yaamicha godhaniiruuf.
Sochiin barattoonni Oromoo biyya keessa fi alatti godhaa jiran jajjabeessaa waan taheef daran cimee akka itti fufu dhaammanna kan je'an barattoonni Oromoo Godina Harargee, duguuginsa sanyii mootummaan wayyaanee bakkoota gara garatti ummata Oromoo irratti raawwataa jiru cimsanii balaaleffatan. Ilmaan Oromoo dantaa yeroof jecha biyya keessaa fi alatti diina tajaajilaa jiran gara qabsoo haqaa ummanni isaanii godhaa jirutti akka deebi'anis gaafatanii jiru.
|
